Keunangan Gaseh Labi-labi

Deungon bismillah haba ta puphon

Saleum ta suson seureuta doa

Haba bak rangkang keunarang di lon

Keu ubat jantong yoh saboh masa

Masa saboh jan yoh saboh lawi

Ngon labi-labi di kuta raja

Jurosan darussalam gampong adek Ti

Bak punggong labi-labi lon sangkot ija

Oh urou beungoh lon lhap kemudi

Pareksa oli radiator seureuta

Ulon tarek choke puta le gunci

Meusen meuie-ie meusu keundara

Toke Kak Mira peugah bak suami

Moto ka asi mita beulanja

Tarek le sibak rukok meuputi

Hana tuwo keu kuphi ngon sikrak bada

Dilon keu keunet bak labi-labi

Pasang le aksi ngon su be raya

Meuhoi peunumpang nyang ula ili

Di Mohammad Jam ngon dek Ti phon meusuwa mata

Nibak masa nyan seunang that hati

Lam moto e akhi cit ukhty semua

Lee aneuk sikula ngon mahasiswi

Maklum hai abi mantong jeum sikula

Ulon sigo-go keureuleng bak dek Ti

Seubab bak bibi na mise muda

Ureung that mameh rumeh hana kri

Seunyum lee geubri keu ulon sigra

Pulpen merek top lon mat bak jari

Peusan begini lon catat sigra

Bek tuwo singoh meurumpok keulayi

Bak pinto adek Ti neupreih kakanda

Lon geunyi keureutah ramah bak jari

Lon preih adek Ti geubayeu sewa

Peng ulon cok, keureutah ulon bri

Bisik le lagi, nanti di baca

Dek Ti teuseuheh rumeh hana ban

Tamse buleun trang malam purnama

Hate that rangou di lon masa nyan

Untong lam badan meuucap sigra

Moto beurangkat sigra masa nyan

Bacut perlahan meuputa roda

Tinggai adek Ti ulon eu badan

Bak pinto geureubang rumoh sikula

Dag dug lam hate wahe e rakan

Wajah teubayang keu aneuk sikula

Teuingat keudrou dilon masa nyan

Dak na kesempatan ikot beulaja

Maklom keuh dikamou han saho troih masa nyan

Urou ngon malam mita beulanja

Ngon moto labi-labi meusipat jalan

Mita penghasilan ngon peut boh roda

Takoh bak mane peuget keu reunyuen

Aneuk rambideun di cong bak pala

Oh nou keuh dilei haba ulon kheun

Jan laen ta sambong peugah calitra

#PanteuTeumuleh